ස්පාඤ්ඤ පාපන්දු පිටිය කම්පාවට පත් කළ අවාසනාවන්ත ඛේදවාචකය

ජේසුස් ද මිගෙල්ගේ දිවි සැරිය නිමාවෙයි ස්පාඤ්ඤ පාපන්දු ක්‍රීඩා ඉතිහාසයේ කිසිදාක නොමැකෙන කළු පැල්ලමක් තබමින්, ටෙනරීෆ් (CD Tenerife) කණ්ඩායමේ දක්ෂ ඉදිරිපෙළ ක්‍රීඩක ජේසුස් ද මිගෙල් අල්මේඩා අවාසනාවන්ත ලෙස ජීවිතක්ෂයට පත්විය. එෆ්.සී. ඇන්ඩෝරා (FC Andorra) කණ්ඩායමට එරෙහිව පැවති තරගයක් අතරතුරදී සිදු වූ බිහිසුණු ගැටීමකින් අනතුරුව හටගත් සංකූලතා හේතුවෙන් 2026 නොවැම්බර් 3 වැනිදා පෙරවරු 8.00ට ඔහු මෙලෙස මියගියේය. මියයන විට ඔහුගේ වයස අවුරුදු 30කි. දැඩි කැපවීමකින් හා උත්සාහයෙන් යුතුව පාපන්දු පිටියේ ඉදිරියට පැමිණි මේ අපූරු ක්‍රීඩකයාගේ අකල් වියෝව සමස්ත ලෝක පාපන්දු ක්‍රීඩා ලෝලීන්ම දැඩි ශෝකයට පත් කිරීමට සමත්ව ඇත. මැඩ්‍රිඩ් නගරයේ උපත ලැබූ ජේසුස් ද මිගෙල්ගේ ළමා කාලය සහ පවුල් පසුබිම ඉතා සරල සහ සංයුක්ත එකක් විය. ඔහුගේ මව්පියන් ටොලේඩෝ ප්‍රාන්තයේ නවාහෙර්‍මෝසා ගමෙන් පැවත එන්නන් වන අතර, ඔහු තම කුඩා කාලයේ ගිම්හාන නිවාඩු ගත කළේ එහිදීය. ඔහුගේ මුළු පවුලම එම ගමේ අය වන අතර, ඔහු පුහුණු වූයේ ද එහි ප්‍රාදේශීය ක්‍රීඩාංගණයේය. ඔහුට වෘත්තීය නර්‍තන ශිල්පිනියක වන මාර්‍තා නම් සහෝදරියක් ද සිටියාය. පෞද්ගලික ජීවිතයේදී සිය බිරිඳ මරියා සමඟ සතුටින් ගත කළ ඔහු, වසරක් සහ මාස හතරක් වයසැති කාර්‍ලා නම් කුඩා දියණියකගේ ආදරණීය පියෙකි. මෙම ඛේදජනක තරගය වන විට බිරිඳ සහ දියණිය ක්‍රීඩාංගණයේ ප්‍රේක්ෂකාගාරයේ සිට ඇති අතර, දෙමාපියන් එය නරඹමින් සිට ඇත්තේ නවාහෙර්‍මෝසා හි මධුවිත්ත පැවතුනු ස්ථානයක රූපවාහිනියෙනි. ජේසුස් ද මිගෙල්ගේ ක්‍රීඩාවට අවතීර්‍ණ වීම ක්‍රමානුකූල සහ කැපවීමෙන් පිරි ගමනකි. ලුගෝ ෆුඑන්ලබ්‍රාඩා සහ ලෙගානෙස් යොවුන් කණ්ඩායම් හරහා තම පාපන්දු දිවිය ආරම්භ කළ ඔහු, 2016දී නැවත ලුගෝ ෆුඑන්ලබ්‍රාඩා වෙත පැමිණ එක් වාරයකදී ගෝල 14ක් වාර්‍තා කළේය. 2017-18 වාරයේදී ඉන්ටර්‍නැෂනල් ද මැඩ්‍රිඩ් වෙනුවෙන් ගෝල නවයක් වාර්‍තා කරමින් එම කණ්ඩායම Segunda Division B පෙළට උසස් කිරීමට ඔහු මුල් විය. ඉන්පසු ෆුඑන්ලබ්‍රාඩා, යූනියන් අඩාර්‍ව්, නවාල්කාර්‍නේරෝ සහ යුනියොනිස්ටාස් ද සලමංකා වැනි කණ්ඩායම් නියෝජනය කරමින් ඔහු තම දස්කම් තවදුරටත් ඔපමට්ටම් කරගත්තේය. ඔහුගේ ක්‍රීඩා දිවියේ ස්වර්‍ණමය යුගය සටහන් වූයේ 2023 ජනවාරියේදී කැස්ටෙයොන් (CD Castellon) කණ්ඩායමට එක්වීමත් සමඟය. 2023-24 වාරයේදී තරග 38කින් ගෝල 16ක් සහ සහාය ගෝල 6ක් වාර්‍තා කළ ඔහු, Primera Federacion II කාණ්ඩයේ ප්‍රමුඛ ගෝල ලබන්නා වෙමින් කැස්ටෙයොන් කණ්ඩායම දෙවන පෙළට ඔසවා තැබීමට ප්‍රධාන දායකත්වයක් ලබා දුන්නේය. 2024 අගෝස්තුවේ ඒබාර් කණ්ඩායමට එරෙහිව වෘත්තීය පෙළේ සිය තරග ජීවිතය ඇරඹූ ඔහු, 2025 ජූලි 8 වැනිදා ටෙනරීෆ් සමඟ අවුරුදු තුනක ගිවිසුමකට අත්සන් තැබීය. 2025-26 වාරයේදී ලීග් තරග 29කින් ගෝල 11ක් වාර්‍තා කරමින් ටෙනරීෆ් කණ්ඩායම ද දෙවන පෙළට උසස් කිරීමට ඔහු සමත්විය. උස අඩි 6ක් (මීටර් 1.90) පමණ වූ, වම් පාදයෙන් ක්‍රීඩා කළ මධ්‍ය ඉදිරිපෙළ ක්‍රීඩකයෙකු වූ ඔහු, සිය ශාරීරික ශක්තියෙන් සහ ගෝල රැස්කිරීමේ අපූරු හැකියාවෙන් කැපී පෙනුණි. මෙම අවාසනාවන්ත සිදුවීම සිදු වූයේ නොවැම්බර් 2 වැනිදා ටෙනරීෆ් හි හෙලියෝඩෝරෝ රොඩි්‍රගස් ලෝපෙස් ක්‍රීඩාංගණයේදීය. ටෙනරීෆ් 2-0 ක ජයග්‍රාහී තත්ත්වයක සිටියදී 59 වැනි විනාඩියේදී ආදේශක ක්‍රීඩකයෙකු ලෙස පිටියට පැමිණි ද මිගෙල්, ලකුණු 2-2 ක් ලෙස සම වූ අමතර කාලයේ හත්වන විනාඩියේදී මෙම අනතුරට මුහුණ පෑවේය. ඇන්ඩෝරා ගෝල රකින්නා වන ජේසුස් ඔවෝනෝ දිගු පන්දුවක් ඉවත් කිරීමට මධ්‍ය පිටියට දිව එන අතරතුර ඔහුගේ දණහිස ද මිගෙල්ගේ පපුවේ වේගයෙන් වැදුණි. ඔවෝනෝට වහාම රතු කාඩ්පතක් ලැබුණු අතර, වෛද්‍යවරුන් විනාඩි පහකට වඩා වැඩි කාලයක් ප්‍රතිකාර කළද, ඔහුට හෘදයාබාධයක් ඇති වී තිබුණි. ගිලන් රථයේදී ස්පන්දනය නැවත ලැබුණද, පසුව ඔහුගේ තත්ත්වය නරක අතට හැරී අදාල දිනයේ පෙරවරු 8ට මරණය තහවුරු විය. පොලීසිය මේ වන විට ගෝල රකින්නාගේ ක්‍රියාව සහ වෛද්‍ය ප්‍රතිකාර ක්‍රියාවලිය විමර්‍ශනය කරමින් සිටින අතර, ගැටීම ක්‍රීඩාවේ කොටසක් ලෙස සිදු වූ නිසා අපරාධ නඩු කටයුතු ඇති වීමට ඇති ඉඩ අඩු බව නීතිඥවරු ප්‍රකාශ කර ඇත. බාසිලෝනා, ඇට්ලෙටිකෝ මැඩ්‍රිඩ්, ලාලීගා සභාපති සහ UEFA ඇතුළු ලෝක ප්‍රසිද්ධ ක්‍රීඩකයින් රැසක් ඔහුට තම ශෝකය ප්‍රකාශ කළහ. ටෙනරීෆ් සහ ඇන්ඩෝරා කණ්ඩායම්වල ඉදිරි සති අන්ත තරග කල් දමා ඇති අතර, නොවැම්බර් 7 වැනිදා සවස 6.00ට හෙලියෝඩෝරෝ ක්‍රීඩාංගණයේදී සිහිවටන උත්සවයක් පැවැත්වීමට නියමිතය. ඔහුගේ දෙමාපියන්ගේ උපන් ගම වන නවාහෙර්‍මෝසා නගර සභාව විසින් දින තුනක නිල ශෝක කාලයක් ප්‍රකාශයට පත් කර ඇති අතර, අවසන් කටයුතු ද එම ප්‍රදේශයේදීම සිදු කෙරේ. ක්‍රීඩකයෙකු ලෙස දැක්වූ විශිෂ්ට දස්කම්වලට එහා ගිය ආදරණීය පියෙකු සහ මිනිසෙකු වූ ජේසුස් ද මිගෙල්, සදහටම පාපන්දු ලෝකයේ මතකයේ රැඳෙනු ඇත. ටරිනි විරාදා