පරණ වාහන හදන්න වියදම වැඩියි.. අලුත් වාහන ගේනවා..- ජනපති
FM Heart · 3 min read
ජනාධිපතිවරයා මේ බව සඳහන් කළේ කොළඹදී පැවති වෘත්තීය සමිති ජාතික සමුළුව අමතමිනි. රාජ්‍ය සේවයේ ප්‍රතිසංස්කරණ, ආර්‍ථික නවීකරණය, බදු සහන මෙන්ම ජාතික ආරක්ෂක නීති පිළිබඳවද ජනාධිපතිවරයා එහිදී දීර්‍ඝ වශයෙන් කරුණු පැහැදිලි කළේය. පැරණි මලකඩ ආකල්පවලින් මිදී නව පරිවර්‍තනයකට රට ගෙන යා යුතු බව පෙන්වා දුන් ජනාධිපතිවරයා, වාහන සංචිතය මෙන්ම රාජ්‍ය සේවයේ පවතින යල්පැනගිය පරිගණක පද්ධතිද ඉවත් කර නවීන පද්ධති ස්ථාපිත කරන බව කීය. ආදායම් බදු ගෙවන්නන් හඳුනාගැනීමේ අංකය ලබාගැනීමට කාර්‍යාල වෙත පැමිණීමට අවශ්‍ය නොවන සේ ඩිජිටල් පද්ධතිය ශක්තිමත් කරන බවත්, ඩිජිටල් ආර්‍ථික පනත කඩිනමින් ගෙනවිත් ඩිජිටල් ආර්‍ථික අධිකාරියක් පිහිටුවන බවත් හෙතෙම සඳහන් කළේය. පෙර පැවති සාම්ප්‍රදායික සූදු වෙනුවට වර්‍තමානයේ අන්තර්‍ජාලය ඔස්සේ දැවැන්ත ව්‍යාපාරයක් ලෙස ක්‍රියාත්මක වන සූදු කර්‍මාන්තය පාලනය කිරීම සඳහා සූදු නියාමන අධිකාරියක් පිහිටුවන බවද කියා සිටියේය. රාජ්‍ය සේවක මූලික වැටුප් ඉහළ දැමීමේ තෙවන අදියර ලබන ජනවාරි මාසයේදී ක්‍රියාත්මක කරන බවත්, 2027 දී මූලික වැටුප් වැඩිවීමෙන් පසු කතා කිරීමට සිටි දීමනා පිළිබඳ ගැටලුවට විසඳුම් දෙමින් ඉදිරි අයවැයෙන් අත්‍යවශ්‍ය දීමනා රැසක් 100%කින් වැඩි කිරීමට කටයුතු කරන බවත් ජනාධිපතිවරයා අවධාරණය කළේය. එමෙන්ම, උපයන විට බද්ද අය කිරීමේ සීමාව රුපියල් ලක්ෂයේ සිට එක්ලක්ෂ පනස්දහස දක්වා ඉහළ දැමූ අතර, ඉදිරි අයවැය ලේඛනය මඟින් එම බදු නිදහස් සීමාව තවදුරටත් ඉහළ දමා ජනතාවට සහනයක් සැලසීමට අපේක්ෂා කරන බවද හෙතෙම සඳහන් කළේය. රැකියා විරහිත තරුණ ප්‍රජාව වෙනුවෙන් රාජ්‍ය සේවයට අලුතින් 121,000ක් බඳවා ගැනීමට තීරණය කර ඇති අතර, ඉන් ගුරුවරුන් 23,000ක් බඳවා ගැනීමේ කටයුතු කඩිනමින් අවසන් කිරීමට නියමිත බවද පැවසීය. වරාය සහ ගුවන්තොටුපොළ සංවර්‍ධනය වෙනුවෙන් නව කළමනාකාරීත්වයක් සහ ප්‍රතිව්‍යුහගත කිරීමක් අවශ්‍ය බව පෙන්වා දුන් ජනාධිපතිවරයා, ඒ සම්බන්ධයෙන් කිසිවෙකුත් අමනාප නොවිය යුතු බවත් තීන්දු තීරණ ගැනීමේදී පසුබට නොවන බවත් කීය. අතීතයේ පාඩු ලැබූ රාජ්‍ය ආයතන රැසක් මේ වන විට ලාභ ලබන තත්ත්වයට පත් කර ඇති බවත්, සතොස සහ ශ්‍රීලන්කන් ගුවන් සේවය මුහුණ දෙන අර්‍බුද සඳහා නව කළමනාකරණ ක්‍රමවේද ඔස්සේ කඩිනමින් විසඳුම් සෙවිය යුතු බවත් ඔහු පැහැදිලි කළේය. වත්මන් රජය යටතේ කුප්‍රකට ත්‍රස්තවාදය වැළැක්වීමේ පනත (PTA) අහෝසි කරන බවට ජනාධිපතිවරයා සහතික විය. ඊට සමගාමීව නව ත්‍රස්තවාදයෙන් රාජ්‍ය ආරක්ෂා කිරීමේ පනතක් සහ සංවිධානාත්මක අපරාධ වැළැක්වීමේ පනතක් අවශ්‍ය වන නමුත්, ඒවා දේශපාලන පළිගැනීම් හෝ මර්‍දනය සඳහා කිසිසේත්ම භාවිත කළ නොහැකි වන පරිදි නිශ්චිත සීමාවන් තුළ කෙටුම්පත් කරන බව හෙතෙම අවධාරණය කළේය. සැබෑ ප්‍රජාතන්ත්‍රවාදය සහ මානව හිමිකම් වෙනුවෙන් පෙනී සිටින සිවිල් සංවිධාන සමඟ සාකච්ඡා කර පුළුල් එකඟතාවකට පැමිණීමෙන් තොරව එම පනත් පාර්‍ලිමේන්තුවේ සම්මත නොකරන බවද ඔහු කීය. තම පාලන කාලය තුළ කිසිදු විරෝධතාවකට එරෙහිව ජල ප්‍රහාර, බැටන් ප්‍රහාර හෝ කඳුළු ගෑස් ප්‍රහාර එල්ල නොකළ බව සිහිපත් කළ ජනාධිපතිවරයා, ජනවරමක් පවතින තාක් ආණ්ඩුවට මර්‍දන පනත් අවශ්‍ය නොවන බවත්, ජනතාව තමන්ට බලයෙන් ඉවත් වන ලෙස ඊළඟ මැතිවරණයේදී තීන්දු කළහොත් කිසිදු පැකිළීමකින් තොරව ඉවත්වීමට සූදානම් බවත් ජනතාව මර්‍දනය කර බලයේ රැඳී සිටීමේ අවශ්‍යතාවක් නොමැති බවත් වැඩිදුරටත් අවධාරණය කළේය.
