ඉන්ධන මිල සංශෝධනය තව ටිකකින්.. ආරංචිය සුබ නෑ..

ජාත්‍යන්තර වෙළෙඳපොළේ බොරතෙල් මිලෙහි සිදුව ඇති වෙනස්කම් හමුවේ මෙවර මෙරට ඉන්ධන මිල ගණන් ඉහළ යාමේ හැකියාවක් පවතින බව වාර්‍තා වේ. ලංකා ඛනිජ තෙල් නීතිගත සංස්ථාව විසින් සෑම මසකම අවසන් දින මධ්‍යම රාත්‍රියේ ක්‍රියාත්මක වන පරිදි මෙම මිල සංශෝධනය ප්‍රකාශයට පත් කරනු ලබන අතර, ඊට සමගාමීව ලංකා අයි.ඕ.සී. සහ සිනොපෙක් ඇතුළු මෙරට ක්‍රියාත්මක අනෙකුත් පෞද්ගලික ඉන්ධන සමාගම් ද සිය මිල ගණන් ඒ අනුව සංශෝධනය කිරීමට නියමිතය. පසුගිය සති කිහිපය පුරා ජාත්‍යන්තර වෙළෙඳපොළේ බොරතෙල් මිලෙහි යම් ඉහළ යාමක් දක්නට ලැබුණු අතර, මැදපෙරදිග කලාපයේ උද්ගතව ඇති නොසන්සුන් භූ-දේශපාලනික වාතාවරණය සහ හෝමූස් සමුද්‍ර සන්ධිය ඇතුළු ප්‍රධාන නාවික වෙළෙඳ මාර්‍ගවල මතුව ඇති අවදානම් තත්ත්වයන් හමුවේ බොරතෙල් බැරලයක මිල සැලකිය යුතු ලෙස ඉහළ ගියේය. මෙම ආනයනික පිරිවැය ඉහළ යාම, නැව් ගාස්තු හා රක්ෂණ වාරික වැඩිවීම මෙරට සිල්ලර ඉන්ධන මිල ගණන් කෙරෙහි සෘජුව බලපාන බැවින්, මෙවර පෙට්‍රල් සහ ඩීසල් මිලෙහි ඉහළ දැමීමක් සිදුවිය හැකි බවට බලශක්ති ක්ෂේත්‍රයේ විශ්ලේෂකයෝ පුරෝකථනය කරති. කෙසේ වෙතත්, ඇමරිකානු ඩොලරයට සාපේක්ෂව ශ්‍රී ලංකා රුපියලේ අගය ස්ථාවර මට්ටමක පැවතීම හේතුවෙන් ගෝලීය මිල ඉහළ යාමේ බර යම් ප්‍රමාණයකට සමනය කරගත හැකිවනු ඇතැයි ද අපේක්ෂා කෙරේ.