
නකල්ස් කැලේ ගල් ගුහාවක සඟවාගෙන සිටි බාලවයස්කාර දැරියක් බිළිඳියක ද සමඟ සොයාගැනේ..
FM Heart · 3 min read
මධ්යම කඳුකරයේ නකල්ස් බටහිර බෑවුම් මායිමේ පිහිටි මීමුරේ, කන්දකැටිය ගම්මානයේ පදිංචිව සිටි මෙම පහළොස් හැවිරිදි දැරිය මීට මාස පහකට පමණ ඉහතදී හිටිහැටියේම අතුරුදන්ව තිබිණි. ඒ සම්බන්ධයෙන් ඇයගේ දෙමාපියන් සහ ඥාතීන් විසින් උඩුදුම්බර පොලිස් ස්ථානය වෙත පැමිණිලි කර තිබූ අතර, ඒ ඔස්සේ උඩුදුම්බර පොලිස් ස්ථානාධිපති ප්රධාන පොලිස් පරීක්ෂක තුසිත දොඹගම්මන මහතාගේ මෙහෙයවීමෙන් විශේෂ විමර්ශනයක් අඛණ්ඩව ක්රියාත්මක විය. කෙසේ වෙතත්, දැරිය පිළිබඳ කිසිදු හෝඩුවාවක් නොලැබී තිබූ පසුබිමක, ප්රදේශයේ වෙළෙඳසලකින් එක් පුද්ගලයකුගේ පරිභෝජනයට ඔබ්බෙන් වූ විශාල සහල් ප්රමාණයක් දිනපතා මිලදී ගන්නා තරුණයකු පිළිබඳව පොලිස් බුද්ධි නිලධාරීන්ට සැකසහිත තොරතුරක් අනාවරණය වී ඇත. මෙම සැකය මත පදනම්ව ක්රියාත්මක වූ පොලිස් නිලධාරීන් කණ්ඩායමක්, අදාළ තරුණයාගේ ගමන් බිමන් පිළිබඳව සෝදිසියෙන් සිට රහසිගතව ඔහු පසුපස ලුහුබැඳ ගොස් තිබේ. එහිදී තරුණයා ගම්මානයෙන් ඔබ්බට වූ මිනිස් වාසයෙන් තොර, ඝන වනාන්තර ප්රදේශයකට ඇතුළු වන ආකාරය නිරීක්ෂණය කළ පොලිස් කණ්ඩායම, දුෂ්කර මඟ ඔස්සේ වනගතව ගොස් සිදුකළ මෙහෙයුමේදී ඉටි රෙදි යොදා ආවරණය කරන ලද ගල් ගුහාවක් සොයාගැනීමට සමත් විය. එම ස්වාභාවික ගල් ලෙන තුළ මාස දෙකක් පමණ වයසැති කිරිසප්පයකු තුරුලු කරගෙන සිටි දැරිය පොලිස් නිලධාරීන්ගේ නිරීක්ෂණයට ලක්ව ඇති අතර, ඇය මීට මාස පහකට පෙර අතුරුදන් වූ බවට සටහන්ව තිබූ පහළොස් හැවිරිදි දැරිය බවට එහිදී නිල වශයෙන් තහවුරු කරගෙන තිබේ. අනතුරුව එම ස්ථානයේ සිටි බිළිඳියගේ පියා බව පැවසෙන 23 හැවිරිදි සැකකාර තරුණයා අත්අඩංගුවට ගෙන ඇති අතර, බාලවයස්කාර මව සහ බිළිඳිය ආරක්ෂිතව පොලිස් භාරයට ගැනිණි. පොලිසිය විසින් සිදුකරන ලද මූලික ප්රශ්න කිරීම්වලදී අනාවරණය වී ඇත්තේ මෙම දැරියගේ දරු ප්රසූතිය කිසිදු වෛද්ය පහසුකමක් නොමැතිව, අදාළ ගල් ලෙන තුළදීම සිදුව ඇති බවයි. දරු ප්රසූතියෙන් පසු බිළිඳියගේ පෙකණිවැල කපා ඉවත් කර ඇත්තේ දේශීය කිතුල් කර්මාන්තයේදී කිතුල් මල් කැපීම සඳහා යොදාගන්නා අතිශය තියුණු කැපුම් ආයුධයකින් බව හෙළිව ඇත. එමෙන්ම, කැලෑවෙන් නෙළාගත් නොයෙක් ඖෂධ පැළෑටි හා වනගත අත්බෙහෙත් වර්ග භාවිත කරමින් මවට සහ බිළිඳියට සාත්තු සප්පායම් කර ඇති බවත්, කිතුල් පැණි උණු කිරීම සඳහා භාවිත කරන විශාල තාච්චියක දමා බිළිඳිය නාවා ඇති බවත් සැකකාර තරුණයා පාපොච්චාරණය කර තිබේ. මෙම වනගත වාසස්ථානය පවත්වාගෙන යාමට සහ ඔවුනට අවශ්ය සැපයුම් සලසා දෙමින් අපරාධය වසන් කිරීමට ආධාර අනුබල ලබාදුන් බව කියන සැකකාර තරුණයාගේ 36 හැවිරිදි ඥාතියකු ද පොලිසිය විසින් පසුව අත්අඩංගුවට ගනු ලැබීය. අපිරිසිදු හා දුෂ්කර පරිසරයක කල්ගත කරමින් සිටි බාලවයස්කාර මව සහ බිළිඳිය පිරිසිදු කිරීමෙන් අනතුරුව, ඔවුන්ගේ සෞඛ්ය තත්ත්වය සහ ඉදිරි වෛද්ය ප්රතිකාර සලකා බලා මහනුවර ජාතික රෝහල වෙත ඇතුළත් කිරීමට පොලිසිය පියවර ගෙන තිබේ. අත්අඩංගුවට ගත් සැකකරුවන් අධිකරණයට ඉදිරිපත් කිරීමට නියමිත අතර, බාලවයස්කාර දැරියක් නීත්යනුකූල භාරකාරත්වයෙන් පැහැරගෙන යාම, ස්ත්රී දූෂණය සහ ඒ සඳහා ආධාර අනුබල දීම ඇතුළු චෝදනා යටතේ උඩුදුම්බර පොලිසිය වැඩිදුර විමර්ශන මෙහෙයවයි.

