ඉන්දියාව වෙඩි තියයි.. පකිස්තානුවන් දෙකක් මරුට.. ඉන්දු-පකිස් යුද්දයක් ඔන්න මෙන්න..

මෙම සිදුවීමට එරෙහිව සිය දැඩි විරෝධය පළ කිරීම සඳහා පාකිස්තාන විදේශ කටයුතු අමාත්‍යාංශය විසින් ඉස්ලාමාබාද් නුවර සිටින ඉන්දීය භාරකාර තානාපතිවරයා කැඳවා තිබේ. නිරායුධ සිවිල් වැසියන් පිරිසක් ඉලක්ක කර කිසිදු සාධාරණ හේතුවක් නොමැතිව මාරාන්තික බලය යෙදවීම අනුමත කළ නොහැකි බවත්, එය මූලික මානව හිමිකම් සහ ජාත්‍යන්තර නීතිය බරපතළ ලෙස උල්ලංඝනය කිරීමක් බවත් පාකිස්තාන විදේශ කාර්‍යාලය නිකුත් කළ නිවේදනයක දැක්වේ. මෙම ඝාතනය සම්බන්ධයෙන් වහාම විනිවිදභාවයෙන් යුත් විශ්වාසනීය පරීක්ෂණයක් පවත්වා, වගකිවයුත්තන්ට එරෙහිව විනය හා නීතිමය පියවර ගෙන ඒ පිළිබඳ තොරතුරු පාකිස්තානයට නිල වශයෙන් දැනුම් දෙන ලෙසද ඉස්ලාමාබාද් පාලනය ඉන්දියාවෙන් ඉල්ලා ඇත. පාකිස්තාන රූපවාහිනී සේවය, එරට ආරක්ෂක අංශ උපුටා දක්වමින් සඳහන් කරන්නේ නැගෙනහිර පාකිස්තානයේ කසූර් දිස්ත්‍රික්කයේ පදිංචි නිරායුධ සිවිල් වැසියන් තිදෙනෙකු දේශසීමා සලකුණු කණුවෙන් ඔබ්බට පියවර කිහිපයක් තැබූ අවස්ථාවේදී ඉන්දීය දේශසීමා ආරක්ෂකයින් වෙඩි තබා ඇති බවයි. ඉන් දෙදෙනෙකු මියගොස් තෙවැන්නා තුවාල ලබා ඇති අතර, ඔවුන් අනවසරයෙන් දේශසීමා ආක්‍රමණය කළ පිරිසක් නොවන බව පාකිස්තාන බලධාරීහු තරයේ ප්‍රකාශ කරති. කෙසේවෙතත්, ඉන්දීය ආරක්ෂක අංශ මේ සම්බන්ධයෙන් පරස්පර ප්‍රකාශයක් සිදුකර ඇති බව ඉන්දීය මාධ්‍ය වාර්‍තා කරයි. ඉන්දීය පන්ජාබ් ප්‍රාන්තයේ ටාර්‍න් ටාරන් දිස්ත්‍රික්කයට අයත් ජාත්‍යන්තර දේශසීමාව ඔස්සේ සැකකටයුතු පුද්ගලයන් තිදෙනෙකු ඉන්දීය භූමියට ඇතුළු වීමට උත්සාහ කළ බව ටාර්‍න් ටාරන් නියෝජ්‍ය පොලිස් අධිකාරී අතුල් සෝනි මහතා පවසා තිබේ. ඉන් එක් අයෙකු යළි පාකිස්තානය දෙසට පලාගියද, අනෙක් දෙදෙනා ආරක්ෂක හමුදා අනතුරු ඇඟවීම් නොතකා, හමුදාව කුපිත කරමින් දිගින් දිගටම ඉන්දීය භූමියට ඇතුළු වීමට උත්සාහ කිරීම නිසා මෙම වෙඩි තැබීම සිදු කළ බවත්, මියගිය දෙදෙනාගේ අනන්‍යතාව තහවුරු කරගැනීමට පරීක්ෂණ පවත්වන බවත් ඉන්දීය පාර්‍ශ්වය සඳහන් කරයි. කාශ්මීර් දේශසීමාවේ නිරන්තර වෙඩි හුවමාරු සිදු වුවද, කිලෝමීටර් 553ක් දිගැති පන්ජාබ් දේශසීමා තීරය සාමාන්‍යයෙන් සාමකාමී කලාපයක් ලෙස පැවතිණි. 2025 අප්‍රේල් මාසයේදී ඉන්දීය පාලන ප්‍රදේශයේ සංචාරකයින් 26 දෙනෙකු ඝාතනය වීමේ සිදුවීම මුල් කරගනිමින් දෙරට අතර ඩ්‍රෝන සහ මිසයිල ප්‍රහාර හුවමාරු වෙමින් දරුණු යුද අවදානමක් මතු වූ අතර, වසර එකහමාරකට පමණ පසු මෙම නව දේශසීමා ඝාතනය වාර්‍තා වී තිබේ. එමෙන්ම, ලෂ්කර්-ඊ-තයිබා සංවිධානයේ ජ්‍යෙෂ්ඨ අණදෙන නිලධාරියෙකු ඝාතනය කළ බවට ඉන්දියාව කළ ප්‍රකාශයක් පාකිස්තාන හමුදාව විසින් ප්‍රතික්ෂේප කර පැය විසිහතරක් ගතවීමටත් පෙර මෙම සිදුවීම වාර්‍තා වීම දෙරටේ සබඳතා තවදුරටත් අවිනිශ්චිත තත්ත්වයකට ඇද දමා ඇත.