බ්‍රසීල ජනාධිපතිවරණයෙන් පැරදුනු බොල්සොනාරෝ රටින් පලා යයි.. ඇමරිකාවෙන් මතුවේ..

බ්‍රසීල පොලිසිය මඟින් ඔහුගේ විදේශ ගමන් බලපත්‍ර අවලංගු කර තිබියදීත්, ෆ්ලාවියෝ බොල්සොනාරෝ ෆ්ලොරිඩා වෙත ළඟා වී ඇති බවත්, ඔහු සහ ඔහුගේ පවුලේ සාමාජිකයන් වෙත වීසා බලපත්‍ර නිකුත් කරමින් එරටට ඇතුළු වීමට ඉඩ සලසන බව අමෙරිකානු රාජ්‍ය දෙපාර්‍තමේන්තුව තමන් වෙත තහවුරු කළ බවත් බීබීසී පුවත් සේවය පවසයි. මෙම පලායාම සම්බන්ධයෙන් දැඩි ලෙස ප්‍රතිචාර දක්වමින්, නැවත වරක් ජනාධිපති ධුරයට තේරී පත් වූ වාමාංශික නායක ලුයිස් ඉනාසියෝ ලූලා ද සිල්වා පවසා ඇත්තේ ෆ්ලාවියෝගේ ක්‍රියාකලාපය "ලැජ්ජා සහගත" බවයි. "සැඟවීමට දෙයක් නැති මිනිසුන්ට කිසිම දේකට බියවීමට හේතුවක් නැහැ. මැතිවරණයෙන් පරාජය වූ වහාම රටින් පලායන පුද්ගලයෙකුගේ හෘද සාක්ෂියේ වරදකාරිත්වය මට සිතාගත හැකියි," යනුවෙන් ලූලා ප්‍රකාශ කර තිබේ. බොල්සොනාරෝට සිය දෙවන මව්බිම බ්‍රසීලය වුවද, ඔහුගේ පළමු කාර්‍යය වී ඇත්තේ "අමෙරිකාවේ සට්ටැඹියෙකු" වීම බවට ද ඔහු චෝදනා කළේය. බ්‍රසීල ශ්‍රේෂ්ඨාධිකරණ විනිසුරු ඇලෙක්සැන්ඩර් ඩි මොරෙයස් විසින් ෆ්ලාවියෝට එරෙහිව ක්‍රියාත්මක වන මුදල් විශුද්ධිකරණ විමර්‍ශනයකට අදාළව, පැය 24ක් ඇතුළත ඔහුගේ විදේශ ගමන් බලපත්‍ර භාර දෙන ලෙසත් ඔහුට රටින් පිටවීම වළක්වන ලෙසත් පසුගිය සඳුදා නියෝග කර තිබිණි. එහෙත් එම කාලසීමාව ඉක්මවා යන තෙක් ඔහු විදේශ ගමන් බලපත්‍ර බාර නොදීම නිසා පොලිසිය විසින් ඒවා අවලංගු කරනු ලැබීය. ෆ්ලාවියෝ බොල්සොනාරෝට එරෙහිව ශ්‍රේෂ්ඨාධිකරණයේ විමර්‍ශන දෙකක් ක්‍රියාත්මකය. ඉන් එකක් වන්නේ රියෝ ද ජැනයිරෝ ප්‍රාන්තයේ ඩිජිටල් ගෙවීම් පද්ධති සහ ඔට්ටු ඇල්ලීමේ ව්‍යාපාර හරහා සිදුවූ බව කියන මුදල් විශුද්ධිකරණ ක්‍රියාවලියකි. අනෙක වන්නේ පෞද්ගලික බැංකුවකින් ඔහුගේ පියාගේ ජීවිත කතාව අලලා නිර්‍මාණය කළ 'ඩාර්‍ක් හෝස්' චිත්‍රපටය වෙනුවෙන් ඩොලර් මිලියන 70ක මුදලක් අවභාවිත කිරීම සම්බන්ධයෙන් පවතින විමර්‍ශනයයි. කෙසේ වෙතත්, ෆ්ලාවියෝ මෙම චෝදනා දිගින් දිගටම ප්‍රතික්ෂේප කර තිබේ. ෆ්ලාවියෝ බොල්සොනාරෝ පෞද්ගලික ගුවන් යානයකින් ආර්‍ජන්ටිනාවේ 'පුවර්‍ටෝ ඉගුවාසු' ගුවන් තොටුපළ හරහා අමෙරිකාවට පලා ගියේදැයි බ්‍රසීල පොලිසිය එරටින් විමසා සිටියද, ඔහු එවැනි නීත්‍යානුකූල පිවිසුමක් හරහා ආර්‍ජන්ටිනාවට ඇතුළු නොවූ බවත් එම ගුවන් යානයේ බොල්සොනාරෝ පවුලේ කිසිවෙකු නොසිටි බවත් හාවියර් මිලෙයිගේ ආර්‍ජන්ටිනා රජය තහවුරු කර ඇත. ඔහු බ්‍රසීලයෙන් පිටව ගිය නිශ්චිත මාර්‍ගය මෙතෙක් අනාවරණය වී නොමැත. නීති විශාරදයන් පෙන්වා දෙන්නේ අධිකරණයෙන් අත්අඩංගුවට ගැනීමේ පූර්‍ව නියෝගයක් නිකුත් කර නොමැති බැවින් ඔහු තාක්ෂණික වශයෙන් මෙතෙක් "පලාගිය වරදකරුවෙකු" ලෙස නම් කළ නොහැකි වුවත්, අධිකරණ නියෝග කඩකිරීම යටතේ මාස 6ක දක්වා සිරදඬුවමකට ඔහු යටත් විය හැකි බවයි. එසේම, වසර 8ක සෙනෙට් සභික ධුර කාලය ලබන වසරේ ජනවාරි 31 දිනෙන් අවසන් වන බැවින් ඔහු සතු පාර්‍ලිමේන්තු මුක්තිය ද අහිමි වනු ඇත. 45 හැවිරිදි ෆ්ලාවියෝ බොල්සොනාරෝ, එරට හිටපු ජනාධිපති ජෙයර් බොල්සොනාරෝගේ වැඩිමහල් පුත්‍රයාය. 2022 පැවති ජනාධිපතිවරණයෙන් ලූලා හමුවේ පරාජය වීමෙන් පසු එරට රාජ්‍ය විරෝධී කුමන්ත්‍රණයකට තැත් කිරීමේ වරදට ජෙයර් බොල්සොනාරෝ මේ වන විට වසර 27ක සිරදඬුවමක් ලබමින් නිවාස අඩස්සියේ පසුවේ. 2022දී සිය පියා ද පරාජයෙන් පසු ෆ්ලොරිඩාවට පලා ගිය ආකාරයෙන්ම, ෆ්ලාවියෝ ද මැතිවරණ ප්‍රතිඵල ප්‍රතික්ෂේප කරමින් ඒවා අවලංගු කළ යුතු යැයි ප්‍රකාශ කරමින් රටින් පිටව ගොස් ඇත. ටෙක්සාස් හි පදිංචිව සිටින ඔහුගේ බාල සොහොයුරු එඩ්වාඩෝ බොල්සොනාරෝ මීට පෙර ප්‍රකාශ කර තිබුණේ ෆ්ලාවියෝ පරාජය වුවහොත් ඔහුට රට හැර යන ලෙස තමන් උපදෙස් දුන් බවයි. සඳුදා දිනයේදී වීඩියෝවක් නිකුත් කරමින් තමන් කිසිසේත්ම රට හැර නොයන බවත් ලූලාට එරෙහිව දේශපාලන විපක්ෂය මෙහෙයවන බවත් ප්‍රකාශ කළ ෆ්ලාවියෝ, එම ප්‍රකාශයෙන් පැය කිහිපයකට පසු මෙලෙස අමෙරිකාවට පලාගොස් ඇති අතර, ඔහුගේ නීතිඥ කණ්ඩායම ද මේ පිළිබඳ කිසිදු තොරතුරක් දැන නොසිටි බව බීබීසී පුවත් සේවය වැඩිදුරටත් වාර්‍තා කර ඇත.