රෝහිත බෝගොල්ලාගම නඩුව අවසන් වන තෙක් රිමාන්ඩ්!

විභාග වෙමින් පවතින නඩුවකට පෙනී නොසිට අධිකරණය මඟහරිමින් සිටියදී අල්ලස් කොමිසම මඟින් අත්අඩංගුවට ගත් හිටපු අමාත්‍ය රෝහිත බෝගොල්ලාගම මහතා, අදාළ නඩු විභාගය අවසන් වන තෙක් රක්ෂිත බන්ධනාගාරගත කිරීමට කොළඹ මහාධිකරණ විනිසුරු රගන්ත ගොඩවෙල මහතා අද නියෝග කළේය. නඩු විභාගය සඳහා අධිකරණය හමුවේ පෙනී නොසිටීම හේතුවෙන් විත්තිකරු දුටුතැන අත්අඩංගුවට ගන්නා ලෙසට මහාධිකරණය මඟින් මීට පෙර විවෘත වරෙන්තුවක් නිකුත් කර තිබූ අතර, ඒ අනුව ක්‍රියාත්මක වූ අල්ලස් හෝ දූෂණ චෝදනා විමර්‍ශන කොමිෂන් සභාවේ නිලධාරීන් විසින් ඔහුව අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව මෙම නියෝගය නිකුත් කෙරිණි. ලන්ඩන් නුවර පැවති ආයෝජන ප්‍රවර්‍ධන මණ්ඩලයේ ප්‍රදර්‍ශනයකට සහභාගී වී, රාජ්‍ය මූල්‍ය රෙගුලාසිවලට පටහැනි අයුරින් රුපියල් ලක්ෂ පහළොවකට අධික මුදලක් ගෙවීම සඳහා ආයෝජන ප්‍රවර්‍ධන මණ්ඩලයේ සභාපතිවරයාව පෙලඹවීම සම්බන්ධයෙන් හිටපු අමාත්‍යවරයාට එරෙහිව මෙම නඩුව පවරා ඇත. අදාළ නඩු කටයුත්ත සඳහා දීර්‍ඝ කාලයක් තිස්සේ අධිකරණය මඟහරිමින් සැඟව සිටීම හේතුවෙන් මහාධිකරණය මඟින් ඔහුට එරෙහිව මෙලෙස වරෙන්තු නිකුත් කර තිබිණි.