හූතින්ගෙන් මක්කමට මිසයිල ප්‍රහාර!

ලොව පුරා මුස්ලිම් බැතිමතුන්ගේ උත්තරීතර පුදබිම වන ශුද්ධ වූ මක්කම නගරයේ තහනම් ගුවන් සීමාවට ඇතුළු වීමට උත්සාහ කළ යේමනයේ හූති සටන්කාමීන්ට අයත් ඩ්‍රෝන යානයක් ගුවනේදීම විනාශ කිරීමට සෞදි අරාබි ගුවන් ආරක්ෂක හමුදාව සමත් වූ බව රොයිටර් සහ ඒ.එෆ්.පී. පුවත් සේවා වාර්‍තා කරයි. යේමනයේ ඉරාන හිතවාදී හූති සටන්කාමීන්ට එරෙහිව මෙහෙයුම් සිදුකරන සෞදි ප්‍රමුඛ ඒකාබද්ධ හමුදා සන්ධානයේ ප්‍රකාශක බ්‍රිගේඩියර් ජනරාල් තුර්‍කි අල්-මල්කි සඳහන් කළේ, මක්කම නගරයට දකුණු දෙසින් වූ ගුවන් සීමාවේදී මෙම ඩ්‍රෝන යානය සාර්‍ථකව වළක්වා විනාශ කළ බවයි. ඉස්ලාමයේ උත්තරීතරම පුණ්‍ය භූමි ද්විත්වයේ සහ වාර්‍ෂික හජ් වන්දනාව ඇතුළු වන්දනා කටයුතුවල නිරත බැතිමතුන්ගේ ආරක්ෂාව කිසිසේත්ම උල්ලංඝනය කළ නොහැකි බව අවධාරණය කළ ප්‍රකාශකයා, හූතිවරුන්ගේ මෙවැනි ප්‍රහාරයන්ට එරෙහිව දැඩි නිවාරණ සහ ප්‍රතිප්‍රහාරාත්මක ක්‍රියාමාර්‍ග ගන්නා බවද අනතුරු ඇඟවීය. 2017 වසරේ ජූලි මස එල්ල වූ බැලස්ටික් මිසයිල ප්‍රහාරක උත්සාහයෙන් පසු මක්කම ඉලක්ක කර හූතිවරුන් එල්ල කළ දෙවන ප්‍රහාරය මෙය බවද හමුදා සන්ධානය පෙන්වා දෙයි. කෙසේ වෙතත්, මෙම ප්‍රකාශය තරයේ ප්‍රතික්ෂේප කරමින් හූති ප්‍රකාශක හසෙම් අල්-අසාද් සිය 'X' ගිණුම ඔස්සේ සඳහන් කර ඇත්තේ, මක්කම නගරය ඉලක්ක කළ බවට සෞදි අරාබිය සිදුකරන ප්‍රකාශය ජනතාව නොමඟ යැවීම සඳහා ගෙතූ පදනම් විරහිත පැරණි අසත්‍යයක් බවයි. මේ අතර, මුස්ලිම් බහුතරයක් වෙසෙන රටවල් 57කින් සමන්විත ‘ඉස්ලාමීය සහයෝගිතා සංවිධානය’ මෙම ප්‍රහාරය පිළිකුල් සහගත ක්‍රියාවක් ලෙස හඳුන්වමින් දැඩි ලෙස හෙළා දැක තිබේ. සෞදි අරාබියේ ස්වෛරීභාවයට සහ පුණ්‍ය භූමීන්වලට එල්ල වන මෙවැනි ආක්‍රමණශීලී ක්‍රියාකාරකම් වහා නතර කළ යුතු බව එම සංවිධානය අවධාරණය කරයි. පසුගිය සතිය පුරා එල්ල වූ අඛණ්ඩ ප්‍රහාර හමුවේ සෞදි අරාබිය මැදපෙරදිග යුද ගැටුමට දැඩි ලෙස මැදිවෙමින් පවතින අතර, මක්කම ඇතුළු ප්‍රධාන නගර රැසක විශේෂ ආරක්ෂක අනතුරු ඇඟවීම් නිකුත් කිරීමට සෞදි රජය පියවර ගෙන ඇත. පවතින ඩ්‍රෝන සහ මිසයිල ප්‍රහාරක තර්‍ජන සැලකිල්ලට ගනිමින් සෞදි අරාබියේ සංචාරය කිරීම පිළිබඳව නැවත සලකා බලන ලෙසත්, යේමන දේශසීමා ආශ්‍රිත ප්‍රදේශවල සංචාරය කිරීමෙන් මුළුමනින්ම වළකින ලෙසත් අමෙරිකානු තානාපති කාර්‍යාලය සිය පුරවැසියන්ට විශේෂ සංචාරක අනතුරු ඇඟවීමක් නිකුත් කර තිබේ. ලෝකයේ ප්‍රධානතම නාවික මාර්‍ගයක් වන බාබ් අල්-මන්ඩෙබ් සමුද්‍ර සන්ධිය ආශ්‍රිත යේමන වෙරළ තීරයේ බලය හූති සටන්කාමීන් විසින් අත්පත් කරගෙන සිටින පසුබිමක, හෝමුස් සමුද්‍ර සන්ධිය මඟහරිමින් තෙල් ප්‍රවාහනය කිරීමට සෞදි අරාබිය දරන උත්සාහයන්ටද මෙමගින් දැඩි බාධා එල්ල වී ඇති බව විදෙස් වාර්‍තා වැඩිදුරටත් පෙන්වා දෙයි.