ඇමරිකාවට විදුලිය අත්හිටුවන බවට කැනඩාවෙන් තර්‍ජන.. වෙළඳ යුද්ධය උච්චතම අවස්ථාවට..

දෙරට අතර පවතින වෙළඳ සාකච්ඡා බිඳ වැටීමත් සමඟ, 2027 ජනවාරි 01 වනදා සිට කැනඩාවෙන් ආනයනය කරන මෝටර් රථ, ට්‍රක් රථ සහ වානේ සඳහා 50%ක දැවැන්ත බදු පැනවීමට ජනාධිපති ට්‍රම්ප් තීරණය කිරීම මෙම අර්‍බුදයට මුල් වී තිබේ. මීට අමතරව ඇමරිකානු ඩොලර් බිලියන 20ක් වටිනා කැනේඩියානු භාණ්ඩ සඳහා ද තවත් 50%ක බද්දක් පසුගිය සෙනසුරාදා සිට ක්‍රියාත්මක විය. ට්‍රම්ප්ගේ මෙම ක්‍රියාකලාපයට දැඩි විරෝධය පළ කරමින් ඔන්ටාරියෝ අගමැති ඩග් ෆෝඩ් ප්‍රකාශ කළේ, ඇමරිකාව කැනේඩියානු නිෂ්පාදන ක්ෂේත්‍රය අඩපණ කිරීමට උත්සාහ කරන්නේ නම්, ඇමරිකානු නිවාස සහ ව්‍යාපාර මිලියන 1.5කට සපයන විදුලිය කපා හැරීමට හෝ එහි මිල ඉහළ නැංවීමට තමන් පසුබට නොවන බවයි. "ට්‍රම්ප් කැනේඩියානු නිෂ්පාදන කර්‍මාන්තය විනාශ කරන්න හදනවා නම්, ඔහුට සිද්ධ වෙයි බැටරි පාර්‍සලයක් ළඟ තබා ගන්න," යැයි ෆෝඩ් උපහාසාත්මකව පවසා තිබේ. මෙම ප්‍රකාශයට ප්‍රතිචාර දක්වමින් ජනාධිපති ට්‍රම්ප් සිය 'Truth Social' ගිණුම හරහා කැනේඩියානු නායකයන් "විහිළුකාරයන්" ලෙස හඳුන්වා ඇති අතර, ඔවුන්ට පෙළගැසෙන ලෙස අනතුරු අඟවා ඇත. එසේ නොවුණහොත් කැනඩාවට අත්වන ඉරණම මීට වඩා දරුණු වනු ඇති බව ද ඔහු පවසා තිබේ. ට්‍රම්ප්ගේ මෙම පෞද්ගලික විවේචනවලට පිළිතුරු දෙමින් අගමැති ෆෝඩ් ද දැඩි ප්‍රකාශයක් සිදු කර ඇති බව RT වාර්‍තා කරයි. මේ අතර, කැනේඩියානු අගමැති මාර්‍ක් කාර්‍නි ද ප්‍රකාශ කර ඇත්තේ ඇමරිකාව "වැඩි යමක් ඉල්ලා ඉතා අඩු යමක් ලබා දෙන" ප්‍රතිපත්තියක් අනුගමනය කරන බවයි. ඊට ප්‍රතිචාරයක් ලෙස සැප්තැම්බර් 08 වනදා සිට ඇමරිකානු භාණ්ඩ සඳහා ද ප්‍රති-බදු පැනවීමට කැනඩාව සූදානම් වේ. කැනඩාව යනු ඇමරිකාවට විදුලිය සපයන ප්‍රධානතම විදේශීය සැපයුම්කරු වන අතර, විශේෂයෙන්ම නිව්‍යෝර්‍ක්, මිචිගන් සහ මිනසෝටා වැනි දේශසීමා ප්‍රාන්තවල විදුලි අවශ්‍යතාවය සඳහා කැනේඩියානු සැපයුම අතිශය තීරණාත්මක සාධකයක් වී ඇති බව ද එම වාර්‍තාවේ වැඩිදුරටත් සඳහන් වේ.