මියෙන වයස හරියටම කියන AI තාක්‍ෂණයක් එයි..
FM Heart · 2 min read
Google AdSense
After Featured Image
ඇමරිකාවේ බොස්ටන් නුවර පිහිටි ප්‍රමුඛ පෙළේ Mass General Brigham ආයතනයේ පර්‍යේෂකයන් කණ්ඩායමක් විසින් සිදුකරන ලද මෙම නවතම අධ්‍යයනය The Lancet Digital Health නම් ලෝක ප්‍රකට වෛද්‍ය සඟරාවේ ප්‍රකාශයට පත් කර තිබේ. විවිධ වයස් කාණ්ඩ සහ ජනවාර්‍ගික පසුබිම් නියෝජනය කෙරෙන මුහුණු ඡායාරූප මිලියන 40කට අධික ප්‍රමාණයක් උපයෝගී කරගනිමින් මෙම කෘත්‍රිම බුද්ධි ආකෘති පුහුණු කර ඇති අතර, වෛද්‍යවරුන්ට රෝගීන් සඳහා වඩාත් සුදුසු හා ඵලදායී ප්‍රතිකාර තීරණය කිරීමට මෙය ඉදිරියේදී ප්‍රබල සහායක මෙවලමක් වනු ඇතැයි අපේක්ෂා කෙරේ. පුද්ගලයෙකු මෙලොව උපන් දින සිට ගෙවීගිය දින දර්‍ශන වසර ගණනින් මනිනු ලබන සාමාන්‍ය වයසට වඩා, සෛලීය හා ශාරීරික මට්ටමින් සිරුර වයස්ගත වී ඇති සැබෑ ආකාරය නිරූපණය කරන්නේ ජෛව විද්‍යාත්මක වයස මඟිනි. පිළිකා මර්‍දන ප්‍රතිකාරවලදී රෝගියාගේ සිරුරේ සැබෑ ශක්තිය මැන බැලීමට මෙම අගය ඉතා තීරණාත්මක වේ. අධ්‍යයනයේ ප්‍රධාන කතුවරයා වන 'මැස් ජෙනරල් බ්‍රිගම්' ආයතනයේ විකිරණ පිළිකා රෝග විශේෂඥ වෛද්‍ය රේමන්ඩ් මැක් ප්‍රකාශ කරන්නේ, සාමාන්‍ය මුහුණේ ඡායාරූපයකින් පමණක් රෝගියෙකුගේ මරණ අවදානම් ලක්ෂණ හඳුනාගැනීමට හැකිවීම තමන් පවා බලවත් විශ්මයට පත්කළ කරුණක් බවයි. විශේෂත්වය වන්නේ, මුහුණේ සිදුකර ඇති රූපලාවණ්‍ය සැත්කම්, බොටොක්ස් (Botox) එන්නත් හෝ මුහුණේ තවරා ඇති ආලේපන මඟින් මෙම AI ආකෘතිවල නිරවද්‍යතාවට කිසිදු බලපෑමක් එල්ල නොවීමයි. ක්‍රිස්තු පූර්‍ව 400 දී පමණ විසූ වෛද්‍ය විද්‍යාවේ පියා ලෙස සැළකෙන ග්‍රීක ජාතික හිපොක්‍රටීස් මරණාසන්න රෝගීන් විස්තර කරමින් දැක්වූ "තියුණු වූ නාසය, ගිලුණු දෑස් සහ ඇතුළට කඩා වැටුණු කම්මුල් පෙදෙස" යන ලක්ෂණ, සහස්‍ර ගණනාවකට පසු අද බිහිවූ AI තාක්ෂණය විසින්ද ස්වයංක්‍රීයව හඳුනාගැනීම අතිශය විශ්මයජනක කරුණක් බව වෛද්‍ය රේමන්ඩ් මැක් පවසයි. කිසිදු ඓතිහාසික ග්‍රන්ථයක් හෝ අන්තර්‍ජාල පෙළ කියවීමකින් තොරව, හුදෙක් ඡායාරූප මිලියන ගණනක් විශ්ලේෂණය කිරීමෙන් පමණක් AI පද්ධතිය හිපොක්‍රටීස්ගේ එම නිගමනයටම ස්වාධීනව එළඹ තිබේ. මෙම AI පද්ධතිය කිසිසේත්ම වෛද්‍යවරුන්ගේ සායනික තක්සේරුව ප්‍රතිස්ථාපනය කිරීම සඳහා නොව, ඔවුන් ගන්නා ප්‍රතිකාර තීරණවලට පූර්‍ව උපකාරකයක් ලෙස පමණක් භාවිත කළ හැකි බව අධ්‍යයනයේ කතුවරු අවධාරණය කරති. මේ සම්බන්ධයෙන් අදහස් දක්වන එමරි විශ්වවිද්‍යාලයේ මහාචාර්‍ය විල්බර් ලැම් පෙන්වා දෙන්නේ විවිධ සමේ පැහැයන්, විවිධ මුහුණේ හැඩතල සහ ජනවාර්‍ගික කණ්ඩායම් සඳහා මෙම තාක්ෂණයේ සාර්‍ථකත්වය ඉදිරියේදී සායනිකව තහවුරු කළ යුතු බවයි. එසේම, සරේ විශ්වවිද්‍යාලයේ කෘත්‍රිම බුද්ධිය පිළිබඳ මහාචාර්‍ය මිරොස්ලාව් බොබර් සඳහන් කරන්නේ, මෙය ඉතා බලාපොරොත්තු සහගත පර්‍යේෂණාත්මක ඉදිරි පියවරක් වුවද, රෝහල් මට්ටමින් ප්‍රතිකාර සඳහා යොදා ගැනීමට පෙර වෛද්‍යවරුන්ගේ සායනික පරීක්ෂණ සමඟ මෙය තවදුරටත් පුළුල් ලෙස සැසඳිය යුතු බවයි.
Google AdSense
In-Article Ad