ළමා කාලයක් අහිමි වූවන්ට නැවත ළමා කාලයක් දෙන්නෝනෑ..- නි. ඇමති

දිවයිනේ පළාත් පාලන ආයතන සියල්ලම පාහේ තම බල ප්‍රදේශයේ දරුවන් වෙනුවෙන් පෙර පාසැල් පවත්වාගෙන යන හෙයින් දිවයින පුරා පළාත් පාලන ආයතන මගින් ද ලෝක ළමා දිනයට සමගාමීව විවිධ වැඩසටහන් රැසක් සංවිධානය කර තිබූ අතර, තංගල්ල ප්‍රාදේශීය සභාව විසින් ප්‍රදේශයේ පෙර පාසල් දරු දැරියන් වෙනුවෙන් සංවිධානය කළ විශේෂ ළමා දින වැඩසටහනක් පැවැත්විණි. එම අවස්ථාවට එක්වෙමින් පළාත් සභා සහ පළාත් පාලන ගරු නියෝජ්‍ය අමාත්‍ය රුවන් සෙනරත් මහතා මෙම කෙටි අදහස් දැක්වීම සිදු කළේය. දරු දැරියන්ගේ සතුට, නිර්‍මාණශීලීත්වය සහ විවිධ හැකියාවන් වර්‍ධනය කිරීමේත් යහපත් ගතිගුණ, ඇවතුම් පැවතුම් හා ගුණධර්‍ම හුරු කිරීමේත් අරමුණින් සංවිධානය කළ මෙම වැඩසටහන විනෝදාත්මක හා නිර්‍මාණාත්මක ක්‍රියාකාරකම් රැසකින් සමන්විත විය. ප්‍රදේශයේ පෙර පාසල් දරු දැරියන් විශාල පිරිසක් සහභාගී වූ මෙම අවස්ථාවේදී ගීත, නර්‍තන සහ විවිධ විනෝදාත්මක අංග සඳහා එක්වෙමින් සුන්දර කාලයක් ගත කිරීමට ඔවුන්ට අවස්ථාව උදා විය. විශේෂයෙන්ම දරු දැරියන්ගේ සහජ හැකියාවන් ඉදිරිපත් කිරීමටත්, සම වයසේ දරුවන් සමඟ සුහදව කටයුතු කිරීමටත්, නව අත්දැකීම් ලබා ගැනීමටත් මෙම වැඩසටහන මඟින් අවකාශ සැලසුණු අතර, ඔවුන්ගේ මානසික සතුට හා සමාජීය වර්‍ධනය සඳහා ද මෙවැනි ක්‍රියාකාරකම් වැදගත් වේ. මෙවැනි වැඩසටහන් හරහා කුඩා අවධියේ සිටම දරුවන් තුළ නිර්‍මාණශීලීත්වය, සහයෝගීතාව, ආත්ම විශ්වාසය සහ සමාජීය වගකීම වර්‍ධනය කිරීමට අවශ්‍ය පසුබිම සකස් කිරීම ද අරමුණු කෙරේ. දරු දැරියන්ගේ මුහුණුවල සිනහවක් ගෙනඑමින්, ඔවුන්ගේ හැකියාවන් අගය කරමින් සහ සතුටින් පිරුණු ළමා කාලයක් සඳහා අවශ්‍ය පරිසරය නිර්‍මාණය කිරීම වෙනුවෙන් පැවැත්වුණු මෙම වැඩසටහන දරුවන්ගේ සිනහවෙන්, සතුටින් හා ක්‍රියාශීලී සහභාගීත්වයෙන් පිරුණු සුන්දර හෝරා කිහිපයක් විය. දරුවන් යනු රටේ අනාගතය වන බැවින්, ඔවුන්ට ආරක්ෂිත, සුරක්ෂිත හා ආදරණීය පරිසරයක් තුළ සිය හැකියාවන් වර්‍ධනය කර ගැනීමට අවශ්‍ය අවස්ථා සහ පහසුකම් සැලසීම සමාජයේ සියලු පාර්‍ශ්වයන්ගේ වගකීමකි. එනයින් ළමා දිනයක් සැමරීම හුදෙක් විනෝදාස්වාදයට පමණක් සීමා නොවී, දරුවන්ගේ අයිතිවාසිකම්, සුරක්ෂිතභාවය, අධ්‍යාපනය, සෞඛ්‍යය සහ යහපැවැත්ම පිළිබඳ සමාජ අවධානය තවදුරටත් ඉහළ නැංවීමේ අවස්ථාවක් විය යුතුය. ඒ අනුව, වත්මන් රජය දරුවන්ගේ සතුට, සුරක්ෂිතභාවය, අධ්‍යාපනය හා පෞරුෂ සංවර්‍ධනය සඳහා අවශ්‍ය පරිසරයක් නිර්‍මාණය කිරීම ප්‍රමුඛ කාර්‍යයක් ලෙස සලකා කටයුතු කරනු ලබයි.