ඇමරිකාව සහ ඊශ්‍රායලය ඉස්ලාමීය එකමුතුවේ සදාකාලික සතුරන්...- ඉරාන උත්තරීතර නායක

ඇමරිකා එක්සත් ජනපදය සහ ඊශ්‍රායලය ඉස්ලාමීය එකමුතුවේ සදාකාලික සතුරන් බවට චෝදනා කරමින් ඔහු මේ බව සඳහන් කළේය. "ඉස්ලාමීය එකමුතු සතිය" නිමිත්තෙන් විශේෂ පණිවිඩයක් නිකුත් කරමින් කමේනි කියා සිටියේ, විශේෂයෙන්ම බටහිර ආසියාවේ සහ පර්‍සියානු ගල්ෆ් කලාපයේ මුස්ලිම් පාලකයන් සිය සැබෑ සතුරා හඳුනාගෙන, ඔවුන්ගේ සැලසුම් වටහා ගනිමින් ඒවාට එරෙහිව නැගී සිටිය යුතු බවයි. ඉරානයේ රාජ්‍ය රූපවාහිනිය වන IRIB සේවය මෙම පුවත වාර්‍තා කර තිබේ. මුස්ලිම් රටවල් අතර පවතින විවිධ වාර්‍ගික, සංස්කෘතික, සමාජීය, ආර්‍ථික සහ දේශපාලන වෙනස්කම් උපයෝගී කරගනිමින් ජනතාව අතර භේද ඇති කිරීමට මෙම සතුරු බලවේග උත්සාහ කරන බව ඔහු පෙන්වා දුන්නේය. එමෙන්ම, ඉරාන වැසියන් අතර ද කිසිදු ආකාරයක බෙදීමක් ඇති වීමට ඉඩ නොතබන ලෙස ඔහු එහිදී ඉල්ලා සිටියේය. "ප්‍රබල ඉස්ලාමීය ශිෂ්ටාචාරයක් ගොඩනැගීම සඳහා මුස්ලිම්වරුන් අතර පවතින එකමුතුකම අත්‍යවශ්‍ය සාධකයක්," යැයි කමේනි අවධාරණය කළේය. වොෂින්ටනය සහ ටෙල් අවිව් පාලනයන් ඉරානයේ පමණක් නොව සමස්ත ඉස්ලාමීය ලෝකයේම සතුරන් බව ඔහු වැඩිදුරටත් පැවසීය. පසුගිය පෙබරවාරි මාසයේදී ඇමරිකාව සහ ඊශ්‍රායලය එක්ව ඉරානයට එල්ල කළ ප්‍රහාරයත් සමඟ මැදපෙරදිග කලාපයේ දැඩි නොසන්සුන්කාරී තත්ත්වයක් හටගත් අතර, ඊට ප්‍රතිචාර වශයෙන් ඉරානය ද ඇමරිකානු හමුදා කඳවුරු පවතින කලාපීය රටවලට ප්‍රහාර එල්ල කළේය. යුද්ධය අවසන් කිරීමේ අරමුණින් පසුගිය ජූනි මාසයේදී ඉරානය සහ ඇමරිකාව අතර කරුණු 14කින් යුත් අවබෝධතා ගිවිසුමක් අත්සන් කළද, එම අතුරු එකඟතාවය ද මේ වන විට අසාර්‍ථක වී ඇති බව වාර්‍තා වේ.