දකුණු කොරියාව සහ ඉන්දියාව අතර රේගු සහයෝගීතාව ඉහළට

දකුණු කොරියාව සහ ඉන්දියාව අතර වෙළඳ කටයුතු වඩාත් සුමටව හා කාර්‍යක්ෂමව පවත්වාගෙන යාම සඳහා දෙරටේ රේගු පරිපාලන අතර සහයෝගීතාව තවදුරටත් ශක්තිමත් කිරීමට එකඟතාවයකට පැමිණි බව කොරියානු රේගු සේවය නිවේදනය කළේය. මේ සම්බන්ධයෙන් වන විශේෂ සාකච්ඡාවක් කොරියානු රේගු සේවයේ නිලධාරීන් සහ ඉන්දියාවේ වක්‍ර බදු සහ රේගු පිළිබඳ මධ්‍යම මණ්ඩලයේ නිලධාරීන් අතර නවදිල්ලි නුවරදී පවත්වා ඇත. එහිදී ඉන්දියාව තුළ ක්‍රියාත්මක වන කොරියානු ව්‍යාපාර සඳහා වඩාත් සුමට ලෙස රේගු නිලධාරීන්ගේ නිවැරදි කිරීම් සහ නිෂ්කාශන කටයුතු සිදුකර දීමට සහාය වන ලෙස කොරියානු පාර්‍ශ්වය ඉන්දීය රජයෙන් ඉල්ලා සිටියේය. මෙම හමුවේදී ඉන්දියාවේ පිහිටි කොරියානු සමාගම් මුහුණ දෙන විවිධ රේගු අභියෝග සහ ගැටලු පිළිබඳව ද කොරියානු රේගු සේවය විසින් කරුණු පැහැදිලි කර ඇත. මීට අමතරව, දෙරට අතර පුහුණු වැඩසටහන් ඇතුළු ද්විපාර්‍ශ්වික සහයෝගීතාව වර්‍ධනය කරගැනීමේ මාර්‍ග පිළිබඳව ද මෙහිදී දීර්‍ඝ ලෙස සාකච්ඡා වී ඇත. මේ පිළිබඳව අදහස් දක්වමින් කොරියානු රේගු සේවයේ ජාත්‍යන්තර කටයුතු පිළිබඳ අධ්‍යක්ෂ ජෙනරාල් හන් මින් සඳහන් කළේ, ආසියා-පැසිෆික් කලාපයේ ප්‍රධාන හවුල්කරුවෙකු වන ඉන්දියාවට අපනයනය කිරීමේදී කොරියානු සමාගම් මුහුණ දෙන බාධක සහ ගැටලු නිරාකරණය කරගැනීම සඳහා දෙරට ඉදිරියටත් සමීපව කටයුතු කිරීමට බලාපොරොත්තු වන බවයි. .