ආසියානු අපරාධ කල්ලිවල නව පාරාදීසය ශ්‍රී ලංකාව ද... වරාය නගරය කේන්ද්‍ර කර මහා පරිමාණ සූදු සහ මූල්‍ය වංචා..

එම වාර්තාවට අනුව, චීනය, පිලිපීනය, වියට්නාමය සහ කාම්බෝජය වැනි රටවලින් පැමිණි දහස් සංඛ්‍යාත පිරිසක් වලංගු වීසා බලපත්‍ර සහිතව සහ රහිතව මෙරට රැඳී සිටිමින් මෙම ජාවාරම්වල නිරත වෙති. ටික්ටොක්, ටෙලිග්‍රෑම් සහ ෆේස්බුක් වැනි සමාජ මාධ්‍ය ඔස්සේ මොවුන්ව බඳවා ගන්නා අතර, ඇමරිකානු ඩොලර් 1,200 සිට 2,000 දක්වා ඉහළ වැටුප්, සුඛෝපභෝගී නවාතැන් සහ ආහාර පාන ලබා දෙන බවට පොරොන්දු වෙමින් මෙම ජාවාරම් මෙහෙයවනු ලබයි. මෙම මෙහෙයුම් බොහොමයක් පිලිපීනයේ තහනම් කරන ලද 'POGO' (Philippine Offshore Gaming Operators) ව්‍යාපාරවලට සමාන වන අතර, ඒවා මෙරට තුළ තොරතුරු තාක්ෂණ හෝ ව්‍යාපාරික ක්‍රියාවලි බාහිරින් ලබා ගැනීමේ (BPO) ආයතන ලෙස වෙස්ගන්වා පවත්වාගෙන යනු ලබයි. සූදු ක්‍රීඩාවට අමතරව මූල්‍ය වංචා, හැකර් ප්‍රහාර, මුදල් විශුද්ධිකරණය සහ මිනිස් ජාවාරම් ද මෙම අපරාධ කල්ලි හරහා සිදුවන බවට තොරතුරු හෙළි වී තිබේ. මීට අමතරව, ගෙවීම් කටයුතු සඳහා ක්‍රිප්ටෝ මුදල් බහුලව භාවිත කරන බව ද සඳහන් වේ. පසුගියදා වරාය නගරයේදී සිදුවූ චීන ජාතිකයෙකු පැහැරගෙන ගොස් ඝාතනය කිරීමේ සිද්ධිය ද මෙම අපරාධ කල්ලිවල ක්‍රියාකාරීත්වය පිළිබඳව බරපතල සැකයක් මතු කරයි. මෙම විදේශිකයන්ගේ පැමිණීමත් සමඟ කොල්ලුපිටිය සහ බම්බලපිටිය වැනි ප්‍රදේශවල සුඛෝපභෝගී නිවාස කුලී මිල ගණන් ද අසාමාන්‍ය ලෙස ඉහළ ගොස් ඇති බව වාර්තා වේ. එමෙන්ම, මෙම ජාවාරම්කරුවන් දැන් ශ්‍රී ලාංකිකයන් ද සිය මෙහෙයුම් සඳහා බඳවා ගැනීමට පටන් ගෙන ඇති අතර, එමගින් දේශීය තරුණ පිරිස් ද සයිබර් අපරාධවලට යොමු වීමේ අවදානමක් මතුව ඇත. මේ සම්බන්ධයෙන් රජය දැඩි අවධානයක් යොමු කර ඇති අතර, පසුගිය සතියේදී පමණක් මෙරට ඉලක්ක කරගත් නීති විරෝධී වෙබ් අඩවි 122ක් අත්හිටුවීමට ඩිජිටල් ආර්ථික අමාත්‍යාංශය පියවර ගෙන ඇත. සූදු ක්‍රීඩාව නියාමනය කිරීම සඳහා නව ආයතනයක් පිහිටුවීමටත්, තායිලන්තය සහ කාම්බෝජය වැනි රටවල් සමඟ එක්ව දේශසීමා අපරාධ මර්දනය කිරීමටත් රජය සාකච්ඡා පවත්වමින් සිටින බව ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා ප්‍රකාශ කර තිබේ. කාම්බෝජයේ මෙවැනි ජාවාරම්වල නිරතව සිට මෙරටට පැමිණි ශ්‍රී ලාංකිකයන් ද මෙම අපරාධ කල්ලිවලට තාක්ෂණික සහාය ලබා දෙන බවට තොරතුරු ලැබී ඇති බවත්, මෙය ජාතික ආරක්ෂාවට මෙන්ම රටේ මූල්‍ය පද්ධතියට ද බරපතල තර්ජනයක් බවත් The Island පුවත්පත වැඩිදුරටත් පෙන්වා දෙයි.