ඉස්ලාම් දහමට අපහාස කිරීමේ චෝදනාව - නීතිපති එක්ක ‘ඩීල් එකකට’ එන්න ඥානසාර හිමි සූදානම් වෙයි!

ඉස්ලාම් දහමට අපහාසාත්මක වන ආකාරයේ ප්‍රකාශයක් සිදුකළේ යැයි චෝදනා කරමින් බොදු බල සේනා සංවිධානයේ ලේකම් ගලගොඩඅත්තේ ඥානසාර හිමියන්ට එරෙහිව ගොනුකර තිබෙන නඩුව සැප්තැම්බර් මස 7 වනදා කැඳවන ලෙස කොළඹ මහාධිකරණය නියම කළේය. මෙම නඩුව අද පූර්ව නඩු විභාග සම්මන්ත්‍රණය සඳහා කොළඹ මහාධිකරණ විනිසුරු බුද්ධික සී. රාගල ඉදිරියේ කැඳවනු ලැබුවේය. එම අවස්ථාවේදී විත්තිකාර ඥානසාර හිමියන් වෙනුවෙන් පෙනීසිටි නීතිඥ අශෝක වීරසූරිය අධිකරණය හමුවේ කරුණු දක්වමින් මෙම නඩුවේ සාක්ෂියක් වශයෙන් නම්කර තිබෙන සංයුක්ත තැටියක් පැමිණිල්ල විසින් මේ දක්වා තමන්ට භාරදී නැති බව පැවසුවේය. මෙම නඩුකරය සම්බන්ධයෙන් නීතිපතිවරයා සමග සාකච්ඡා කර එය කෙටියෙන් අවසන් කර ගැනීමට අපේක්ෂා කරන බවත්, ඒ අනුව නීතිපතිවරයා සමග සාකච්ඡා කර එහි ප්‍රගතිය දැනුම්දීම සඳහා දිනයක් ලබා දෙන ලෙසත් නීතිඥවරයා අධිකරණයෙන් ඉල්ලා සිටියේය. ඉදිරිපත් වූ කරුණු සලකා බැලූ මහාධිකරණ විනිසුරුවරයා රජයේ නීතිඥවරයාට නියම කළේ, මෙම නඩුකරයට අදාළ සංයුක්ත තැටිය මීළඟ නඩු දිනයට පෙර කෙසේ හෝ විත්තිය වෙත ලබාදීමට කටයුතු කරන ලෙසයි. ඉන් අනතුරුව මෙම කටයුතුවල ප්‍රගතිය විමසීම සඳහා නඩුකරය සැප්තැම්බර් මස 07 වන දා කැඳවන ලෙසත් මහාධිකරණ විනිසුරුවරයා නියෝග කළේය.