කොළඹ කාණු හදල තියෙන්නේ 30mm ක වැස්සකටයි.. ඒක මදි නිසයි ඊයෙ යටවුනේ..- නගරාධිපතිනි
FM Heart · 2 min read
සුළු වැස්සකදී පවා කොළඹ නගරය සහ තදාසන්න ප්‍රදේශ ජලයෙන් යටවීමේ ගැටලුවට කඩිනම් සහ ක්ෂණික විසඳුම් හඳුනාගැනීම සඳහා අදාළ සියලුම රාජ්‍ය ආයතන සහ බලධාරීන්ගේ සහභාගීත්වයෙන් යුත් විශේෂ හදිසි සාකච්ඡාවක් මේ වන විට ආරම්භ කර ඇති බවද නගරාධිපතිනිය සඳහන් කළාය. නාගරික ඉංජිනේරු අංශ, ශ්‍රී ලංකා ඉඩම් සංවර්‍ධනය කිරීමේ සංස්ථාව, මාර්‍ග සංවර්‍ධන අධිකාරිය, පොලිස් රථවාහන අංශය සහ ආපදා කළමනාකරණ නිලධාරීන් මෙම සාකච්ඡාවට එක්ව සිටිති. සිකුරාදා පස්වරුවේ කොළඹ නගරයට ඇදහැළුණු මෙම අසාමාන්‍ය ධාරානිපාත වර්‍ෂාව හමුවේ නගරයේ ජනජීවිතය සහ ප්‍රවාහන පද්ධතිය මුළුමනින්ම අඩාල විය. කොල්ලුපිටිය ගාලු පාර, බම්බලපිටිය, බොරැල්ල, මරදාන, ආමර් වීදිය, තුම්මුල්ල සහ නගර ශාලාව අවට ප්‍රධාන මාර්‍ග අඩි එකහමාරකට ආසන්න උසකට ජලයෙන් යටවීම හේතුවෙන් කිලෝමීටර් ගණනාවක් දිවෙන දැවැන්ත රථවාහන තදබදයක් නිර්‍මාණය වූ අතර අධිවේගී මාර්‍ග පිවිසුම්ද දැඩි ලෙස අවහිර විය. එමෙන්ම, කොළඹ කොටුව සහ මරදාන අතර දුම්‍රිය සංඥා පද්ධතිය ජලයෙන් යටවීම හේතුවෙන් හටගත් හදිසි කාර්‍මික දෝෂයක් නිසා ප්‍රධාන මාර්‍ගය, මුහුදුබඩ මාර්‍ගය සහ කැලණිවැලි මාර්‍ගයේ ධාවනය වූ සියලුම කාර්‍යාල දුම්‍රිය පැය ගණනාවක් ප්‍රමාද වී මගී ජනතාව දැඩි අසීරුතාවට පත්වූහ. වඩාත්ම බරපතළ සිදුවීම වූයේ කොළඹ ජාතික රෝහල් පරිශ්‍රයට සහ හදිසි අනතුරු ඒකකයට වැසි ජලය කාන්දු වීමයි. ජල මට්ටම ඉහළ යාම නිසා රෝහලේ විදුලි සෝපාන පද්ධතිය සම්පූර්‍ණයෙන්ම අක්‍රිය කිරීමට සිදු වූ අතර, ඒ හේතුවෙන් බරපතළ රෝගීන් වාට්ටු සහ ශල්‍යාගාර අතරට රැගෙන යාමට පවා දැඩි බාධා එල්ල විය. පවතින අන්තර් මෝසම් කාලගුණ තත්ත්වය හේතුවෙන් ඉදිරි දිනවලදීද සවස් කාලයේ තද වැසි අපේක්ෂා කරන පසුබිමක, කානු පද්ධතිවල අවහිරතා කඩිනමින් ඉවත් කිරීම සහ ජලය බැසයාමේ මාර්‍ග විධිමත් කිරීම කෙරෙහි අද පැවැත්වෙන සාකච්ඡාවේදී විශේෂ අවධානය යොමුව තිබේ.
