ජනාධිපති කාර්‍යාලය ඉදිරියේ සත්‍යග්‍රහය රැය පහන් කරයි.. තව දුරටත් ඉදිරියට..

'නිදහසේ පාද යාත්‍රාව' නමින් සංවිධානය කර තිබූ මෙම විරෝධතා පාගමනින් ඊයේ පස්වරුවේ ජනාධිපති ලේකම් කාර්‍යාලය අභියසට පැමිණි භික්ෂූන් වහන්සේ ඇතුළු පිරිස, සිය ඉල්ලීම ජනාධිපති ලේකම්වරයා ප්‍රමුඛ ජ්‍යෙෂ්ඨ නිලධාරීන් වෙත ඉදිරිපත් කිරීමට පියවර ගත්හ. එහිදී ජනාධිපති ලේකම් කාර්‍යාලයේ නිලධාරීන් දැනුම් දී ඇත්තේ මහා සංඝරත්නය ඉදිරිපත් කළ එම ඉල්ලීම සම්බන්ධයෙන් තීරණයක් ලබා දීම සඳහා මාසයක පමණ කාලයක් අවශ්‍ය වන බවයි. කෙසේ වෙතත්, එම ස්ථාවරය පිළිගැනීම තරයේ ප්‍රතික්ෂේප කළ උද්ඝෝෂණයේ නිරත හිමිවරුන්, ඥානසාර හිමියන් නිදහස් කිරීම පිළිබඳව ස්ථිර සහ නිශ්චිත දිනයක් ලබා දෙන තෙක් එම ස්ථානයෙන් කිසිසේත්ම ඉවත් නොවන බව පවසමින් ජනාධිපති ලේකම් කාර්‍යාලය ඉදිරිපිට බිම වාඩි වී සිය විරෝධතාව අඛණ්ඩව ඉදිරියට ගෙන යාමට තීරණය කළහ. මේ අතර, රැඳී සිටීම සඳහා භික්ෂූන් වහන්සේ එම ස්ථානයේ තාවකාලික කූඩාරමක් ඉදිකිරීමට උත්සාහ දැරීමේදී පොලිසිය සහ උන්වහන්සේලා අතර දැඩි නොසන්සුන්කාරී තත්ත්වයක් නිර්‍මාණය විය. අනතුරුව පොලිසියේ නියෝගය හා මැදිහත්වීම මත මාර්‍ගය අවහිර නොවන සේ එම කූඩාරම මාර්‍ගයේ පසෙකට ගෙන යාමට පියවර ගැනිණි. ඉන්පසුව රැස්ව සිටි මහා සංඝරත්නය ජනාධිපති කාර්‍යාලය ඉදිරිපිට සෙත් පිරිත් සජ්ඣායනා කරමින් ආශීර්‍වාද කළ අතර, උන්වහන්සේලා තවදුරටත් එම ස්ථානයේම රැඳී සිටිමින් සත්‍යග්‍රහය පවත්වාගෙන යන බැවින් එම ප්‍රදේශයේ ආරක්ෂාව තහවුරු කිරීම සඳහා විශේෂ පොලිස් කණ්ඩායම් කිහිපයක්ම එම ස්ථානයට කැඳවා ආරක්ෂාව තර කර ඇත. අධිකරණ තීන්දුවක් ප්‍රකාරව වරදකරු වී බන්ධනාගාරගතව පසුවන පූජ්‍ය ගලගොඩඅත්තේ ඥානසාර හිමියන්ට ජනාධිපති සමාව ලබා දී වහා නිදහස් කරන ලෙස ඉල්ලා ජාතික සංවිධාන සහ මහා සංඝරත්නය විසින් විවිධ මට්ටමේ බලපෑම් එල්ල කරමින් සිටියහ. මෙම ගැටලුව සම්බන්ධයෙන් රජය පැත්තෙන් සාධනීය ප්‍රවේශයක් මෙතෙක් නොලැබීම හේතුවෙන්, මෙලෙස ජනාධිපති ලේකම් කාර්‍යාලය වෙත පාද යාත්‍රාවකින් පැමිණ සෘජු සත්‍යග්‍රහයක් ආරම්භ කිරීමට මහා සංඝරත්නය පියවර ගෙන තිබේ.