හවුති මිසයිල ප්‍රහාර හමුවේ සෞදි කුමරු බංකරයක සැගවේ...

ඔටුන්න හිමි කුමරුගේ චලනයන් පිළිබඳව සමීප නිලධාරීන් උපුටා දක්වමින් එම පුවත්පත පෙන්වා දෙන්නේ, තෝරාගත් විශේෂ ආරක්ෂක කණ්ඩායමක රැකවල් මැද පසුවන 41 හැවිරිදි සල්මාන් කුමරු සිය ආරක්ෂක විධිවිධාන අතිශය දැඩි කර ඇති බවයි. ඔහු අවසන් වරට ප්‍රසිද්ධියේ පෙනී සිට ඇත්තේ ජාතික වැඩසටහනක් යටතේ ලේ පරිත්‍යාග කිරීම සඳහා පසුගිය අඟහරුවාදා දිනයේදී බව ද වාර්‍තා වේ. පසුගිය සෙනසුරාදා රියාද්හි පිහිටි කිං කාලිඩ් ජාත්‍යන්තර ගුවන් තොටුපළ වෙත හවුති මිසයිලයක් පතිත වීමෙන් පුද්ගලයින් 12 දෙනෙකු ජීවිතක්ෂයට පත්ව සිය ගණනක් බරපතළ තුවාල ලබා ඇත. ප්‍රහාරයෙන් ගුවන් පර්‍යන්ත දෙකකට දැඩි හානි සිදුව ඇති අතර වහල කොටස් කඩා වැටී තිබේ. ජීවිතක්ෂයට පත්වූවන් අතර 28 හැවිරිදි ඊජිප්තු ජාතික ගුවන් සේවිකාවක ද වන බව නිලධාරීන් තහවුරු කර ඇත. ඉන් නොනැවතී, ඉරිදා දිනයේදී ද ගුවන් තොටුපළ ඉලක්ක කර එල්ල වූ ප්‍රහාරයකින් සිව්වැනි පර්‍යන්තයේ ගින්නක් හටගෙන තවත් පිරිසක් තුවාල ලබා ඇති බව සඳහන් වේ. අගනුවර පුරා මිසයිල පිපිරුම් හඬ පැතිර යාමත් සමඟ රියාද් නගරය යුද කලාපයක ස්වරූපයක් ගෙන ඇති අතර, මූල්‍ය දිස්ත්‍රික්කයේ සේවකයන්ට, ජාත්‍යන්තර පාසල් සිසුන්ට මෙන්ම රාජ්‍ය තාන්ත්‍රිකයින්ට ද ආරක්ෂිත ස්ථාන වෙත ගමන් කරන ලෙස උපදෙස් දී තිබේ. බ්‍රහස්පතින්දා දිනයේදී ගුවනේදීම විනාශ කරන ලද බැලිස්ටික් මිසයිලයක සුන්බුන් පෙරපාසලක් සහ වෛද්‍ය මධ්‍යස්ථානයක් මතට පතිත වීමෙන් සිවිල් වැසියන් දැඩි අවදානමකට ලක්ව ඇති බව ද පුවත්පත වාර්‍තා කරයි. සෞදි අරාබිය සතුව පවතින මිසයිල නාශක පද්ධති අවසන් වෙමින් පවතින බවට සෞදි නිලධාරීන් අනතුරු අඟවා ඇති බව ‘වෝල් ස්ට්‍රීට් ජර්‍නල්’ වාර්‍තාවේ දැක්වේ. මේ හේතුවෙන් රාජකීය මාළිගා සහ තීරණාත්මක බලශක්ති යටිතල පහසුකම් ආරක්ෂා කරගැනීම සඳහා ගුවන් ආරක්ෂක පද්ධති විවිධ ස්ථාන කරා මාරු කිරීමට එරටට සිදුව තිබේ. මේ අතර, හවුති ප්‍රහාර හේතුවෙන් රතු මුහුද හරහා තෙල් අපනයනය කරන ‘නැගෙනහිර-බටහිර’ තෙල් නල මාර්‍ගය, තෙල් පිරිපහදු සහ රතු මුහුදේ නාවික ගමනාගමනය දැඩි තර්‍ජනයකට ලක්ව ඇති අතර, ඔක්තෝබර් මස අග භාගයේ පැවැත්වීමට නියමිතව තිබූ දැවැන්ත ජාත්‍යන්තර ආයෝජන සමුළුව ද අවිනිශ්චිත තත්ත්වයකට පත්ව ඇත. සෞදි අරාබිය සංචාරක, තාක්ෂණික සහ ආයෝජන කේන්ද්‍රස්ථානයක් බවට පත්කිරීම උදෙසා 'නියොම්' වැනි අනාගත නගර නිර්‍මාණය කරමින් සල්මාන් කුමරු ගෙන ගිය දැවැන්ත ආර්‍ථික පරිවර්‍තන වැඩපිළිවෙළ මෙම අනාරක්ෂිත වාතාවරණය හමුවේ බරපතළ අර්‍බුදයකට මුහුණ දී තිබේ. සෞදි මුදල් අමාත්‍යාංශය පුරෝකථනය කර ඇත්තේ 2026 වසරේදී එරට ආර්‍ථිකය 3.6% කින් හැකිළෙනු ඇති බවයි. යේමනය තුළ හවුතිවරුන් අත්පත් කරගෙන ඇති භූමි ප්‍රදේශ ආපසු අත්පත් කරගැනීමට සෘජු යුද සහාය ලබාදෙන ලෙස සෞදි අරාබිය කළ ඉල්ලීම් වොෂින්ටනය මෙතෙක් ප්‍රතික්ෂේප කර ඇති බව පුවත්පත අනාවරණය කරයි. කෙසේ වෙතත්, ගුවන් තොටුපළ ප්‍රහාරයෙන් අනතුරුව අදහස් දැක්වූ හිටපු ජනාධිපති ඩොනල්ඩ් ට්‍රම්ප්, හවුතිවරුන් කළ ක්‍රියාව ඉතා නරක බවත්, සෞදි අරාබිය සමඟ එක්ව ප්‍රහාර එල්ල කිරීමට ඇමෙරිකාව සම්බන්ධ විය හැකි බවත් පවසා තිබේ. මේ අතර, පවතින තත්ත්වය පාලනය කිරීම සඳහා සෞදි අරාබිය පාකිස්තානයෙන් ද අමතර ගුවන් ආරක්ෂණ පද්ධති ඉල්ලා ඇති බව 'ද වෝල් ස්ට්‍රීට් ජර්‍නල්' පුවත්පත වැඩිදුරටත් වාර්‍තා කර ඇත.