තවත් IMF වැඩසටහනකට යනවා.. මේ දිනවල එය සාකච්චා කරනවා.. අපි දෙගොල්ලන්ගෙ ලොකු වෙනසක් නෑ..- ජනාධිපති

ජනාධිපතිවරයා මේ බව සඳහන් කළේ 'ශ්‍රී ලංකා ආර්‍ථික සහ ආයෝජන සමුළුව' (Sri Lanka Economic and Investment Summit) අමතමිනි. එහිදී වැඩිදුරටත් අදහස් දැක්වූ ජනාධිපතිවරයා කියා සිටියේ, ජාත්‍යන්තර මූල්‍ය අරමුදලේ සිව්වසරක විස්තීර්‍ණ ණය පහසුකම් වැඩසටහනේ ප්‍රධාන ඉලක්කය වූ ආර්‍ථිකය ස්ථාවර කරගැනීම මේ වන විට සෑම අතින්ම පාහේ සැලකිය යුතු මට්ටමකින් ළඟා කරගෙන ඇති බවයි. රජයේ මීළඟ සැලසුම සහ ප්‍රමුඛතාව වන්නේ එම ස්ථායීතාව අඛණ්ඩව සුරකිමින්, රටට අවශ්‍ය ආර්‍ථික වර්‍ධනය (Growth) අත්පත් කර ගැනීම බව ද හෙතෙම පෙන්වා දුන්නේය. රජය බලයට පත්වීමෙන් පසු අපේක්ෂා කළ අරමුණු සාක්ෂාත් කරගැනීමේදී ජාත්‍යන්තර මූල්‍ය අරමුදලේ එකඟතා බාධාවක් වූයේ ඉතා අල්ප වශයෙන් බව සඳහන් කළ ජනාධිපතිවරයා, ආර්‍ථිකය ස්ථාවර කිරීම උදෙසා රජයේ දැක්ම සහ මූල්‍ය අරමුදලේ වැඩපිළිවෙළ අතර විශාල පරස්පරතාවක් නොතිබූ බැවින් ගැටුමකින් තොරව මෙම වැඩසටහන ඉදිරියට මෙහෙයවීමට හැකි වූ බව ද සිහිපත් කළේය. වත්මන් මූල්‍ය අරමුදල් වැඩසටහන සඳහා තවත් මාස හයක පමණ කාලයක් ඉතිරිව ඇති බව පැවසූ ජනාධිපතිවරයා, මීළඟ වැඩසටහනේ ස්වභාවය කෙබඳු විය යුතු ද යන්න පිළිබඳව මුදල් අමාත්‍යාංශය, ශ්‍රී ලංකා මහ බැංකු අධිපතිවරයා ඇතුළු ආර්‍ථික විශේෂඥ කණ්ඩායම සමඟ මේ වන විටත් සාකච්ඡා කරමින් සිටින බව සඳහන් කළේය. මූල්‍ය අරමුදල සම්පූර්‍ණයෙන්ම අත්හැර දැමීම හෝ එකඟතාවලටම පමණක් සීමා වීම වෙනුවට රජය මේ දෙස ඉතා විවෘත මනසකින් යුතුව බලන බවත්, ඉදිරියේදී එල්ල විය හැකි බාහිර ආර්‍ථික කම්පනයන්ට සාර්‍ථකව ඔරොත්තු දිය හැකි ශක්තිමත් ආර්‍ථිකයක් නිර්‍මාණය කිරීමට අවශ්‍ය ඉදිරි තීන්දු තීරණ ගන්නා බවත් ජනාධිපතිවරයා වැඩිදුරටත් අවධාරණය කළේය.