කිලිනොච්චි පාපන්දු තරගය යුද පිටියක් වෙයි.. ක්‍රීඩකයන්, පේ්‍රක්‍ෂකයන් පොදියට ගහගනිති.. පොලිසියෙන් වෙඩි තබයි.. දහයක් රෝහලේ...
FM Heart · 1 min read
කිලිනොච්චිය, ජයපුරම් කිරාන්චි පොදු ක්‍රීඩාංගණයේ පැවති පාපන්දු තරගයක් අතරතුර දෙපිරිසක් අතර ඇති වූ ප්‍රචණ්ඩ ගැටුමක් මැඩපැවැත්වීම සඳහා පොලිසිය අහසට වෙඩි තබා ඇත. කණ්ඩායම් දෙකක් අතර පැවති තරගාවලියක් අතරතුර තරගයේ විනිසුරුවරයා ලබාදුන් තීරණයකට එරෙහිව කණ්ඩායම් දෙකේ ක්‍රීඩකයන් දෙදෙනෙකු අතර මුලින්ම බහින්බස්වීමක් හටගෙන ඇති අතර, පසුව එය පහරදීමක් දක්වා දුරදිග ගොස් ඇත. අනතුරුව දෙපිලේම ක්‍රීඩකයන් එකිනෙකාට පහරදී ගනිද්දී, තරගය නැරඹීමට පැමිණ සිටි 400කට ආසන්න ප්‍රේක්ෂක පිරිසක් ද ක්‍රීඩා පිටියට කඩා වැදී පොලු මුගුරු සහ යතුරුපැදි ආරක්ෂිත හිස්වැසුම්වලින් පහර දී ගැනීම හේතුවෙන් එම ස්ථානයේ දැඩි කලහකාරී තත්ත්වයක් උද්ගත ඇත. තරගාවලියේ ආරක්ෂාවට යොදවා සිටි පොලිස් නිලධාරීන් ගැටුම ආරම්භ වූ අවස්ථාවේදීම එය පාලනය කිරීමට උත්සාහ කළ ද තත්ත්වය පාලනයෙන් තොරව ප්‍රචණ්ඩකාරී වී තිබේ. ඒ හේතුවෙන් උප පොලිස් පරීක්ෂකවරයකු විසින් පොලිස් කොස්තාපල්වරයෙකු සතුව තිබූ ටී-56 වර්‍ගයේ රාජකාරි ගිනිඅවිය ලබාගෙන අහසට වෙඩි උණ්ඩ 10ක් පමණ මුදාහරිමින් කලහකාරී තත්ත්වය සම්පූර්‍ණයෙන්ම මැඩපවත්වා ඇත. මෙම ගැටුමෙන් තුවාල ලැබූ පුද්ගලයන් පස්දෙනෙකු කිලිනොච්චිය රෝහලට ඇතුළත් කර ඇති අතර, පොලිසිය තැබූ වෙඩි ප්‍රහාරවලින් කිසිදු පුද්ගලයෙකුට තුවාල සිදුව නොමැති බව ද තහවුරු කර තිබේ. සිද්ධිය සම්බන්ධයෙන් ජයපුරම් පොලිසියේ නිලධාරීන් කණ්ඩායමක් විසින් වැඩිදුර විමර්‍ශන මෙහෙයවනු ලබයි.
