ආර්‍ථිකය අවදානමක..- මහ බැංකුවෙන් වාර්‍තාවක්..

මහ බැංකුව විසින් නිකුත් කරන ලද 2026 අගෝස්තු මුදල් ප්‍රතිපත්ති වාර්‍තාව මගින් පෙන්වා දෙන්නේ, 2026 වසරේ මුල් භාගයේදී ආර්‍ථිකය යම් ස්ථාවරත්වයක් පෙන්නුම් කළ ද, බාහිර සහ අභ්‍යන්තර සාධක කිහිපයක් හේතුවෙන් එම තත්ත්වය වෙනස් විය හැකි බවයි. වාර්‍තාවට අනුව, මැදපෙරදිග යුදමය වාතාවරණය හේතුවෙන් ගෝලීය බලශක්ති මිල ගණන් ඉහළ යාම සහ නාවික ගමන් මාර්‍ගවලට බාධා එල්ල වීම මෙරට උද්ධමනය කෙරෙහි සෘජුව බලපානු ඇත. මෙහි ප්‍රතිඵලයක් ලෙස දේශීය ඉන්ධන, විදුලි ගාස්තු සහ ප්‍රවාහන පිරිවැය ඉහළ යා හැකි අතර, පොහොර මිල ඉහළ යාම හරහා ආහාර නිෂ්පාදන පිරිවැය ද ඉහළ යාමේ අවදානමක් පවතී. එමෙන්ම, විදේශීය අංශයේ පීඩනයන් හමුවේ රුපියල අවප්‍රමාණය වුවහොත් ආනයනික භාණ්ඩ මිල තවදුරටත් ඉහළ යනු ඇතැයි මහ බැංකුව අපේක්ෂා කරයි. ගෝලීය ආර්‍ථිකය මන්දගාමී වීම හේතුවෙන් ශ්‍රී ලංකාවේ ප්‍රධාන අපනයන වෙළඳපොළවල් දුර්‍වල විය හැකි බවත්, එමගින් අපනයන ආදායම පහත වැටිය හැකි බවත් වාර්‍තාවේ සඳහන් වේ. මීට අමතරව, ප්‍රධාන සංචාරක දේශීය වශයෙන් පවතින දේශගුණික අවදානම් පිළිබඳව ද මහ බැංකුව විශේෂ අවධානයක් යොමු කර ඇත. 'එල් නිනෝ' තත්ත්වය හේතුවෙන් ඇතිවිය හැකි වියළි කාලගුණය සහ අක්‍රමවත් වර්‍ෂාපතනය කෘෂිකාර්‍මික නිෂ්පාදනයට මෙන්ම ජල විදුලි උත්පාදනයට ද දැඩි බාධාවක් වනු ඇත. ජල විදුලි උත්පාදනය සීමා වීම නිසා වැඩි පිරිවැයක් සහිත තාප විදුලිය මත යැපීමට සිදුවීමෙන් බලශක්ති පිරිවැය සහ නිෂ්පාදන වියදම් තවදුරටත් ඉහළ යා හැකි බව මහ බැංකුව පෙන්වා දෙයි. අඛණ්ඩව සිදුකළ යුතු විදේශ ණය සේවාකරණය සහ ගෝලීය මූල්‍ය වෙළඳපොළේ පවතින අස්ථාවරත්වය හේතුවෙන් මෙරට දළ නිල සංචිත කෙරෙහි ද පීඩනයක් එල්ල වී තිබේ. 2026 ජූනි මාසය අවසානයේදී සංචිත මට්ටම යම් ප්‍රමාණයකින් පහළ ගොස් ඇති බව ද වාර්‍තාවේ සඳහන් වේ. මෙම සියලු තත්ත්වයන් සැලකිල්ලට ගනිමින්, ඉදිරි කාලසීමාව තුළ ආර්‍ථික ස්ථාවරත්වය පවත්වා ගැනීම සඳහා ඉතා සුපරීක්ෂාකාරී මුදල් ප්‍රතිපත්තියක් අනුගමනය කිරීම සහ ව්‍යුහාත්මක ප්‍රතිසංස්කරණ කඩිනම් කිරීම අත්‍යවශ්‍ය බව ශ්‍රී ලංකා මහ බැංකුව සිය වාර්‍තාව මගින් අවධාරණය කර සිටියි.